ڕووداوە مێژووییەکان
١١ی خەرمانانی ١٣٢٥
✍️ئەنوەر مەعریفەت
٧٣ساڵ پێش ئێستا سەقز بوو بەناوەندی«شارستان»ی سەقز. ئەنجومەنی وەزیران(هیئت دولت)ی ئێران بەسەرۆکایەتی ئەحمەدی قەوام لەم ڕۆژەدا پێشنیاری وەزارەتی ناوخۆی بۆ بە شارستان بوونی سەقز پەسەندکرد و بڕیاردرا شاری سەقز کە لە ڕووی دابەشکاریی ئیداریی وڵاتەوە، «شار»ێکی سەر بە شارستانی سنە بوو، ببێ بە «شارستان» و ناوەندی «فەرمانداریی» تیا دابمەزرێت.
ئەنجومەنی وەزیران هەروەها پەسەندی کرد کە «بانە»ش لە سنە جیابکرێتەوە و کاروباری ئیداریی و فەرمانگە دەوڵەتییەکانی، سەر بە شارستانی سەقز بێت. شایانی یاداوەرییە کە ساڵی ١٣١٤ سەقز فەرمانگەی شارەوانیی تیا دامەزرا و یازدە ساڵ دوای بە شار بوونی، کرایە ناوەندی شارستان.
بە مەبەستی بەرزکردنەوەی شوناسی ئیداریی و ئاسانکاریی لە ڕاپەڕاندنی کار وباری ئیداری و ئابووری شارستان، ئەنجومەنی وەزیران ڕۆژی ٢٢ سەرماوەزی ١٣٩٣ ئاستی«فەرمانداریی تایبەت»ی بۆ سەقز پەسەندکردکە لەم ئاستەدا فەرماندار، دەسەڵاتی ڕاستەوخۆی جێگری ئوستانداری وەردەگرت.
