٢٢ی ڕێبەندانی ١٣٠٢ی هەتاوی  

ڕووداوە مێژووییەکان| ئەنوەر مەعریفەت

٩٥ ساڵ پێش و لەم ڕۆژەدا پێنجەمین خولی مەجلیسی شۆرای مێللی ئێران لە تاران کرایەوە. لەم خولەدا میرزا ئەسەدوڵلاخان کوردستانی، فەرەجوڵلاخان ئاسەف و میرزا محەمەدخان وەکێڵ وەک نوێنەرانی شاری سنە و میرزا عەبدولعەزیز موفتی (صدرالعلما) وەک نوێنەری سەقز و بانە و سەید محەمەد ڕەزا مساوات بە ناو نوێنەری سابڵاغ بەشداریی دانیشتنەکانی پاڕلەمانیان کرد.

سەیید محەمەد ڕەزا مساوات کە کوردیش نەبوو هەر لەم ساڵەدا کۆچی دوایی کرد و لە جێگەی ناوبراو، ڕەحیم زادەی سەفەوی بە نوێنەرایەتی شاری سابڵاغ دانرا کە ئەویش کورد و خەڵکی ناوچەکە نەبوو.

شایانی باسە میرزا عەبدولعەزیزی موفتی ئەندامی مەجلیسی دامەزرێنەران(موئه‌سسان)یش بوو کە دەنگی بە هەڵوەشانەوەی ڕژیمی سەڵتەنەتی قاجاڕەکان دابوو.