ڕووداوە مێژووییەکان
۳۱ی خاکەلێوە‌ی ۱۳۰۲ی هه‌تاوی و ۵ی ره‌مه‌زانی ۱۳۴۱ی مانگی
ئەنوەر مەعریفەت| ٩٦ ساڵ پێش ئێستا حاجی مەحموودی ئەمینی ناسراو بە (حاجی مەلیکولتوجار) لە مانگی ڕەمەزان و پێش بەربانگی ئەمڕۆژە بە دەست و فەرمانی بەگزادەکان کوژرا و تەرمەکەیان شاردەوە کە پاشتر دۆزرایەوە و لە ڕی و رەسمێکی شایان دا ئەسپەردەی خاک کرا.
گۆیا هۆی کوشتنی حاجی مەحموود ئەوە بوو کە وێڕای جەماعەتێکی تر لە هاوشاریانی سەقزی کە ڕازی و پێمل بە دەسەڵاتی زۆرەملی عەشایەر و سمایل ئاغای شکاک(سمکۆ) نەبوون پەنامەکی نامەی سكاڵیان دەنارد بۆ سنە و تاران، ئەمەش لای بەگزادەکان ئاشکرا دەبێ و هەندێ نامە و تۆماریان دەست دەکەوێت. لەبەر ئەمە ئەکەونە وێزەی نووسەران و بنێرانی نامە، کە یەکیان مەلیکولتوجار بوو. گیراوەکانی دیکەیان بە پارە و بەرتیل ڕزگار کرد، بەڵام مەلیکولتوجاریان کوشت.
بە هۆی بەدواداچوون و سکاڵای حاجی محەمەد و بنەماڵەی ئەمینی، دواتر ڕۆستەم خانی ساوان وەک ئامری کوشتنی مەلیکولتوجار و هەروەها حەیبەڵلاخانی حەبیبی لە سەقز لەسێدارە دران.
